حواديت مصر المحروسة
مما رأته العين من أحوال مصر المحروسة وأهلها
الثلاثاء، فبراير 19، 2013
الخميس، يناير 31، 2013
الخميس، فبراير 16، 2012
على إسم مصر…
على إسم مصر
أشعار: صلاح جاهين
تصوير: محمد شادي
على اسم مصر التاريخ يقدر يقول ما شاء
أنا مصر عندي أحب وأجمل الأشياء
باحبها وهي مالكه الأرض شرق وغرب
وباحبها وهي مرميه جريحة حرب
باحبها بعنف وبرقة وعلى استحياء
واكرهها وألعن أبوها بعشق زي الداء
واسيبها واطفش في درب وتبقى هي ف درب
وتلتفت تلتقيني جنبها في الكرب
والنبض ينفض عروقي بألف نغمة وضرب
على اسم مصر
مصر النسيم في الليالي وبياعين الفل
ومرايه بهتانة ع القهوة .. أزورها .. واطل
القى النديم طل من مطرح منا طليت
والقاها برواز معلق عندنا في البيت
فيه القمر مصطفى كامل حبيب الكل
المصري باشا بشواربه اللي ما عرفوا الذل
ومصر فوق في الفراندة واسمها جولييت
ولما جيت بعد روميو بربع قرن بكيت
ومسحت دمعي في كمي ومن ساعتها وعيت
مصر السما الفزدقي وعصافير معدية
والقلة مملية ع الشباك .. مندية
والجد قاعد مربع يقرا في الجرنال
الكاتب المصري ذاته مندمج في مقال
ومصر قدامه اكتر كلمة مقرية
قريتها من قبل ما اكتب اسمي بإيديا
ورسمتها في الخيال على أبدع الأشكال
ونزلت أيام صبايا طفت كل مجال
زي المنادي وفؤادي يرتجف بجلال
مصر .. التلات أحرف الساكنة اللي شاحنة ضجيج
زوم الهوا وطقش موج البحر لما يهيج
وعجيج حوافر خيول بتجر زغروطة
حزمة نغم صعب داخلة مسامعي مقروطة
في مسامي مضغوطه مع دمي لها تعاريج
ترع وقنوات سقت من جسمي كل نسيج
وجميع خيوط النسيج على نبرة مربوطة
اسمعها مهموسة والا اسمعها مشخوطه
شبكة رادار قلبي جوه ضلوعي مضبوطة
على اسم مصر
من ارشيف الحواديت
-
حين نعطي البيوت أسماء من لم يعيشوا فيها طويلا بقلم وتصوير محمد شادي بيت الكريتلية الذى بناه أحد أعيان القاهرة وهو محمد بن الحاج س...
-
العين تسمع و الأذن ترى بقلم و تصوير: محمد شادي لم الفجر قد بزغ بعد حين سمعت همساً عميقاً، كأنما يأتي من أزمنة سحيقة وراء هذا...
-
القصر.. والرجل.. والحكاية في ضيافة حضرة والي مصر ... الكبير بقلم وتصوير: محمد شادي كان اليوم على وشك الانتصاف، حين أخبرني ممثله بم...
-
مصر... بتاعة مين ؟؟؟ بقلم وتصوير: محمد شادي كالعادة في صباح كل سبت، أخرج من بيتي في ضاحية مصر الجديدة التي لاتزال تحتفظ ببعض جمال كان يغمره...
-
على إسم مصر أشعار: صلاح جاهين تصوير: محمد شادي على اسم مصر التاريخ يقدر يقول ما شاء أنا مصر عندي أحب وأجمل الأشياء باحبها وهي...
-
القاهرة الحديثة... حلم رجل وحقيقة تدوم لمئات السنين بقلم وتصوير محمد شادي في خطوات واثقة، ارتقى درجات السلم الحجري في نهاية الممش...