تلغرافات للنيل
(1)
كنت اشتريت دمعك بحبات المطر
وبرغم ده
لا الحزن مات فيا
ولا الشتا جاني
حالف ما ييجي الا اما يلقى الرد ع الأسئلة
مين هو سجاني
خوف الحروف فوق الشفايف
ولا دمعك ده اللي ورق بين ضلوعي
شجرة هموم
حالفة لا تطرح موت ف أحلامي
(2)
مش باسأل الشمس الهروب من حضنك الدافي لكفي
بس الغريب
ان الثواني اللي ما بين كلمة بحبك وابتسامك
كانت كفاية اني انتهي من لمعتي
وابدأ ف لحظة الانطفا فيا
مخزون سعادتي بينفجر وبينجرح ويطش ويطرطش على هدومي
وانا بارسم النيل والهرم والناس والازهر والولاد
الموت بيضحك
والجرح مفتوح للديابة وللبشر
واحد يمد ايديه
ويرشقها ف جرحي
يفتفت النفس اللي فاضل
ف ابتسامي
(3)
الحصة دي مش للعلام
الحصة دي حصة بكا
كل الشوارع جنب بيتنا مسفلته
وبرغم ده
متعلمة تشرب دمايا الطيبة
الدم فوق الأرض كاتب كل حاجة
الدم متعلم
يهرب من الأسفلت والبنزين وصوت الموت
يهرب لكم
الدم متعلم يموت
الدم كان بيهزكم
وانا لما دمي كان بيجري لحدكم
وقفتوا ليه متكتفين؟؟؟
(4)
يا سنين ف عمري اللي انتها بدري
مدي الايدين
باب السما مفتوح
باب القلوب مقفول
وبيبان كتير متواربة
بتشوف كل حاجة
بس علشان الفضول
أما الهروب
ليا أنا وحدي
والامتثال للخوف
ليا أنا وحدي
والحلم ده اللي انكسر
حلمي أنا وحدي
قدري أموت مكسور
قدري
أموت
وحدي
(5)
مش قلت لك يا نيل؟
الناس ف بلدي
نسيت هديل الحمام
عشقت بارود الرصاص
مش قلت لك يا نيل؟
مد الايدين
اغسل قلوب الطيبين
اكسر شعاع الحزن ف عنيهم
انشر غسيلك على كوم الجراح النازفة من دمي
أحمر بعطر الميدان
ابيض ف لون الكفن
اسود يا توب أمي
أخضر يا لون الزيتون
بس العيون عميا
ماتكحلوش الجفون
شمسي مغمية
ولا تبعتوش تلغرافات وعليها عنواني
البوستة فرد حمام
حاطط على الشاهد
اليافطة فوق كلام
الموت كتير
واحد
وانا ألف مرة باموت مش مرة واحدة وبس
لما الرصاص بيفوت
الجبن ليه
يتحس
(6)
مش قلت لك يا نيل
انا من زمان قلت لك
إني ماليش ديه
قدري اني افضل كده
ف الوصل والانفصال
الجرح رد السؤال
قدري أكون موال
طب لجل خاطر النبي
إقرالي عدّيَّة
محمد شادي
